मिरारोड (पूर्व) येथील भारतरत्न गानसम्राज्ञी लता मंगेशकर नाट्यगृहात नुकतेच पार पडलेले स्पर्धा परीक्षा मार्गदर्शन शिबिर म्हणजे इच्छाशक्तीला दिशा देणारा एक प्रेरणादायी अनुभव ठरला. समर्पित सामाजिक संस्था, छत्रपती शिवाजी महाराज चॅरिटेबल ट्रस्ट आणि तिमिरातुनी तेजाकडे या तीन संस्थांच्या संयुक्त विद्यमाने आयोजित करण्यात आलेल्या या शिबिरास शेकडो विद्यार्थ्यांनी उत्स्फूर्त सहभाग नोंदवून भरघोस प्रतिसाद दिला.
या उपक्रमात मुंबई आणि उपनगरांतील — विशेषतः बोरिवली, दहिसर, मीरारोड आणि भाईंदर येथील — विद्यार्थ्यांनी सहभाग घेतला. मार्गदर्शन सत्रात केवळ अभ्यास पद्धती नव्हे, तर परीक्षेतील यशासाठी आवश्यक असणारे मनोबल, नियोजन कौशल्य, प्रश्नपत्रिकेचे विश्लेषण यांसारख्या महत्त्वाच्या बाबींवर सखोल मार्गदर्शन करण्यात आले.
प्रेरणा देणारे मार्गदर्शक आणि मान्यवर उपस्थिती
या शिबिरात प्रमुख मार्गदर्शक म्हणून तिमिरातुनी तेजाकडे संस्थेचे संस्थापक आणि कनिष्ठ अनुवाद अधिकारी (मुंबई सीमाशुल्क, भारत सरकार) सत्यवान यशवंत रेडकर यांनी आपल्या अनुभवातून विद्यार्थ्यांना योग्य दिशा दाखवली. त्यांच्या मार्गदर्शनामुळे विद्यार्थ्यांमध्ये आत्मविश्वास आणि नवीन ऊर्जा निर्माण झाली.
पोलिस उपायुक्त राहुल चव्हाण, नायब तहसीलदार प्रथमेश पुरके, समर्पित सामाजिक संस्थेचे अध्यक्ष ॲड. प्रदीप सामंत, छत्रपती शिवाजी महाराज चॅरिटेबल ट्रस्टचे संस्थापक अध्यक्ष सोमनाथ पवार आदी मान्यवरांनी आपल्या अनुभवांतून विद्यार्थ्यांना स्फूर्ती आणि मार्गदर्शन दिले.
नायब तहसीलदार प्रथमेश पुरके यांनी आपल्या भाषणात विद्यार्थ्यांनी केवळ अभ्यासात नव्हे तर कौशल्यविकासाकडेही लक्ष देण्याचे महत्त्व अधोरेखित केले.
उत्कृष्ट आयोजन आणि कार्यकर्त्यांची मेहनत
या यशस्वी शिबिरामागे अनेक समर्पित कार्यकर्त्यांचे अथक परिश्रम होते. समर्पित सामाजिक संस्था आणि छत्रपती शिवाजी महाराज चॅरिटेबल ट्रस्टच्या कार्यकर्त्यांनी अत्यंत नेटके आयोजन केले. यामध्ये ॲड. प्रदीप सामंत (अध्यक्ष), रवींद्र भोसले (कार्याध्यक्ष), ॲड. मारुती भट्टगिरी (सरचिटणीस), सिद्धेश पाटील (शहर अध्यक्ष), संतोष पाटील (उपाध्यक्ष), दिपेश सरोदे (ठाणे पालघर जिल्हा अध्यक्ष), प्रतीक सुर्वे (IT विभाग), निरंजन नवले (शहर संघटक) आणि संदीप पवार (सरचिटणीस, ट्रस्ट) यांचा मोलाचा वाटा होता.
विद्यार्थ्यांना मिळाली यशाकडे वाटचाल करण्याची दिशा
हा उपक्रम विद्यार्थ्यांच्या शासकीय सेवेत प्रवेशाच्या प्रवासाला एक नवी दिशा आणि प्रेरणा देणारा ठरला. अनेक विद्यार्थ्यांनी या सत्रानंतर आपला आत्मविश्वास वाढल्याचे स्पष्टपणे नमूद केले. आयोजक संस्थांनी अशा उपक्रमांचे सातत्याने आयोजन करण्याचा संकल्प यावेळी जाहीर केला.
स्पर्धा परीक्षांच्या तयारीसाठी फक्त पुस्तकी ज्ञान नव्हे, तर योग्य मार्गदर्शन आणि प्रेरणा यांचीही तेवढीच गरज असते. मीरारोडमध्ये पार पडलेले हे शिबिर त्या दिशेने एक मोठे पाऊल होते. भविष्यातील शासकीय अधिकारी या शिबिरातून निश्चितच घडतील, असा विश्वास सहभागी विद्यार्थी आणि मार्गदर्शकांनी व्यक्त केला.
