सिडको अभियंता भरती परीक्षेत मराठी विषयाचा समावेश; मनसेच्या पाठपुराव्याला यश

Marathi subject included in CIDCO engineer recruitment exam; MNS’s pursuit is successful

ठाणे, ता. २८ : सिडको महामंडळात सहाय्यक अभियंता (स्थापत्य) संवर्गातील १०१ रिक्त पदे भरण्यासाठी मागील वर्षी ऑनलाइन अर्ज मागविण्यात आले होते. मात्र, या परीक्षेच्या अभ्यासक्रमातून मराठी विषय वगळल्यामुळे मराठी उमेदवारांमध्ये तीव्र नाराजी पसरली होती. महाराष्ट्र नवनिर्माण सेनेच्या (मनसे) सततच्या पाठपुराव्यानंतर अखेर सिडको प्राधिकरणाने ९ जानेवारी रोजी अधिसूचना जारी करून परीक्षेत मराठी विषयाचा समावेश करण्यात आल्याची घोषणा केली.

मराठी विषय वगळण्याचा निर्णय व त्यावरील आक्षेप

सिडको महामंडळाने १८ जानेवारी २०२४ रोजी सहाय्यक अभियंता (स्थापत्य) संवर्गातील भरतीची जाहिरात प्रसिद्ध केली होती. परीक्षेच्या अभ्यासक्रमात इंग्रजी, सामान्यज्ञान, आकलन क्षमता आणि व्यावसायिक ज्ञान हे विषय होते. मात्र, महाराष्ट्रातील परीक्षांमध्ये महत्त्वाचा घटक असलेला ‘मराठी भाषा’ विषय वगळण्यात आला होता.

या निर्णयाविरोधात अनेक मराठी उमेदवारांनी आवाज उठवला. म्युनिसिपल इंजिनिअर्स असोसिएशनने देखील मराठी विषय समाविष्ट करण्याची मागणी केली. मनसेचे पदाधिकारी संदीप पाचंगे यांच्याकडे तक्रारी आल्यावर त्यांनी तातडीने यावर पाठपुरावा सुरू केला.

मनसेचा आक्रमक पवित्रा व यशस्वी संघर्ष

मनसेने मराठी भाषेवरील अन्यायाविरोधात ठाम भूमिका घेतली. संदीप पाचंगे यांनी ही बाब तत्काळ तत्कालीन मुख्यमंत्री एकनाथ शिंदे आणि सिडकोच्या अधिकाऱ्यांकडे मांडली. यापूर्वीही सिडकोच्या परीक्षेत मराठी विषय असायचा, मात्र काही अधिकाऱ्यांनी मुद्दामहून तो वगळल्याचे आढळून आले. हा निर्णय मनसेने खोडसाळपणा ठरवत त्याला जोरदार विरोध दर्शवला.

सततच्या पाठपुराव्यानंतर अखेर सिडको प्राधिकरणाने ९ जानेवारी रोजी एक शुद्धिपत्रक काढून मराठी विषय परीक्षा प्रक्रियेत समाविष्ट केल्याची अधिकृत घोषणा केली.

मराठी अभियंत्यांमध्ये आनंद, मनसेचे आभार

मराठी भाषा हा महाराष्ट्राच्या शासकीय परीक्षांचा अविभाज्य भाग आहे. मराठी अभियंत्यांना आपल्या मातृभाषेतील ज्ञानाची संधी नाकारली जात असल्याने उमेदवारांमध्ये नाराजी होती. मात्र, अखेर मराठी विषय पुन्हा समाविष्ट झाल्याने हजारो उमेदवारांनी समाधान व्यक्त केले आहे.

संदीप पाचंगे यांनी प्रतिक्रिया देताना सांगितले, “मराठी भाषेला अभिजात दर्जा मिळूनही शासनदरबारीच तिची उपेक्षा होत असेल, तर मनसे कदापि गप्प बसणार नाही. हा मराठी अभियंत्यांचा विजय आहे आणि पुढेही आमची लढाई सुरूच राहील.”

मराठीसाठी आणखी लढे उभारण्याचा निर्धार

सिडकोच्या या निर्णयामुळे मराठी अभियंत्यांना न्याय मिळाला असला, तरी भविष्यात अशा प्रकारची भाषा-उपेक्षा होऊ नये, यासाठी मनसे आणि मराठी प्रेमी संघटनांनी अधिक जागरूक राहण्याचा निर्धार केला आहे.

मराठी भाषा आणि उमेदवारांच्या हक्कांसाठी लढणाऱ्या या संघर्षाचा यशस्वी शेवट झाल्याने महाराष्ट्रभर आनंदाचे वातावरण असून, मनसेच्या या लढ्याची सर्वत्र दखल घेतली जात आहे.